أمراض نفسية غائبة الذِكر : متلازمة أنا الذي والذينا

أمراض نفسية غائبة الذكر

متلازمة( أنا الذي والذينا )

يعرف مجتمعيًا باسم " الإدعاء " وفي بعض الأوساط الشعبية يعرب بـ " الفَشر " أو " التمييس " بينما يعرف المريض بلقب " أبو لمعة " نسبة لأحد الشخصيات التليفزيونية الشهيرة .
فترة حضانة المرض :
ملوش فترة حضانة بصراحة .. بس هو بيقعد مع المريض من الحضانة لحد ما ربنا ياخده ( قولوا آمين )
يتصف المرض بعدة صفحات أساسية :
1- يدّعي المريض دائمًا وابدًا وجود علاقات بينه وبين شخصيات هامة ومشهورة في أي مجال كان .
2- ينسج لنفسه نجاحات من وحي خياله - المريض طبعًا - وينشرها بين القاصي والداني .. وعادة ما يمر المريض بثلاثة مراحل .. مرحلة " تأليف الكذبة " .. مرحلة " نشر الكذبة " .. مرحلة " أنا مصدق نفسي " وتكون المرحلة الثالثة أخطرهم
3- كثيرا ما يُصاب المريض بنسبة كبيرة من النسيان .. حيث يحدثك عن أحد بطولاته في مكان وزمان ما .. وبعدها بفترة يحدثك عن بطولة تناقض تماما البطولة السابقة .
4- كثيرًا ما يستخدم المريض كلمات وجمل ثابتة مثل " أنا " ، " رغم إني مشغول جدًا " ، " النجاح اللي وصلت له فضل من عند ربنا " ، " النجاح سهل بس الحفاظ عليه صعب " و قد يفحمك و يقولك " متقارنش نفسك بيا أنا نحفت في الصخر وقتلت واتقتلت عشان اوصل للي وصلت له " .. تيجي تبص ع اللي وصله .. متلاقيش حاجة
5- يصاب المريض بنوع من أنوع البلادة بحيث يكون متأكد تمامًا من أن المستمعين مش مصدقين ولا كلمة من كلامه .. بس مصمم يكمل فشر ! ( راجع شخصية القرموطي في فيلم معلش إحنا بنتبهدل )
6- التاريخ والشهود والزمن من ألد أعداء المريض عشان بيفكروه بواقعه الحقيقي

أماكن انتشار المرض :
منتشر بكثرة في الطبقة المتوسطة

التأثير السلبي للمرض على الأصحاء :

1- في كثير من الأحيان بتبقا مطالب أنك تقعد تبتسم وتهز دماغك وأنت بتسمع الفَشر عشان متحرجش الفشار .. أو عشان ميتكبش قدام اسمك " سوء استماع وسخرية " اه و الله .
2- لو أنت علي مقربة من الفشار بتبقا مطالب أنك تحفظ الفشر بتاعه عن ظهر قلب بحيث لو حد سألك متقولش الحقيقة وتبقا بوظت الدنيا .. و هذا ما يسمى بـ " الفشر السلبي " زي التدخين السلبي كدا


و ربنا يعافينا جميعًا

Read More

أمراض نفسية غائبة الذِكر : متلازمة بيست سيلر

أمراض نفسية غائبة الذكر

متلازمة ( بيست سيلر )

البيست سيلر أو الأكثر مبيعًا أو الكتاب الفظيع اللي بيعمل مليون طبعة في الدقيقة هو مرض يصيب عادة أربع أصناف من البني أدمين : الكتّاب والقراء والناشرين وأصحاب المكتبات .

فترة حضانة المرض :

عدد محدود من الثواني ( يا دوب يقرأ " أكثر مبيعًا " على الغلاف الخارجي للكتاب ) .

يتصف المرض بعدة صفحات أساسية :

1- عدم قدرة المريض – بعد الشر عنكم يعني - على تحديد جودة الكتاب من عدمها ما دام أطلق عليه لقب " بيست سيلر " .

2- سعي المريض – في حالة إن كان كاتب أو ناشر – للحصول على اللقب أن شاء الله يشتري هو الكتب ،رغم أنه كدا بيعيش نفسه والقراء المتابعين له – دا لو عنده قراء – في وهم قد يفقده المصداقية والناس تبطل تصدقه ثم تبطل تقرأ له ، بس مش مهم طالما هو " بيست سيلر " .

3- لا يُصاب الشعراء بهذا المرض خالص !

4- في بعض الحالات المصابة من أصحاب المكتبات تجد المرض وصل لدرجة إنك في لما تسأله  : " إيه رأيك في الكتاب الفلاني " .. يرد يقولك : " بيبيع كويس ! " أو " مبيبعش كويس " .. متناسيًا إنك بتسأله عن كتاب مش عن ماركة جبنة تلاجة ( مع تقديري للجبنة التلاجة ) .

5- القارئ المصاب بالمرض يسهل تحديده من وسط أقرانه ، فهو اللي تلاقيه مشير صورة فيها بتاع 20 كتاب من " البيست سيلر " و يقول للناس " أنا جبت كل دول أبتدي بأنهي فيهم " إلي أن يصل به الحال لأنه يبقا بيشتري " البسيت سيلر " عشان يشير صورهم بس !

6- يهاجم المريض أي حد يغلط في كتاب " بيست سيلر " أو يقول إن الكتاب ميستاهلش .. بيوصل أحيانا الأمر لحد الـ " أن فيريند " و " البلوك " .. قبلها بيكون في مجموعة سباب من نوعيه " أنت حاقدٍ أو حاسدٍ أو مُسْتَغلٍ أو مُسْتِغلٍ أو مدفوع من خصوم الكاتب " .

أماكن انتشار المرض :

1- بعض جروبات القراءة على الفيس بوك 

2- بعض حفلات التوقيع

3- بعض جروبات المجموعات الثقافية

4- جروبات محبين بعض الكتّاب  

التأثير السلبي للمرض على الأصحاء :

1- يصاب بعض الكتاب من الـ " مش بيست سيلر " بالاكتئاب وبعضهم حاول يتنحر والباقي بيحاول .

2- يصاب القراء الأصحاء بحالة من اليأس والحسرة على مستقبل القراءة في البلد ، لدرجة قد تؤدي بيهم لأنهم يبطلوا يقروا أصلا !

3- بعض الناشرين الأصحاء بيصل بيهم الأمر إلى الإفلاس وفي ناس منهم قرروا يعملوا مشروع فول وطعمية أكرم لهم .


و ربنا يعافينا جميعًا

Read More